સ્વચ્છતા પખવાડા 2025: ૧૬ થી ૩૦ સપ્ટેમ્બર દરમિયાન શાળાઓમાં યોજાશે વિશેષ કાર્યક્રમો
સમગ્ર શિક્ષા, ગુજરાત રાજ્ય દ્વારા તારીખ ૧૧.૦૯.૨૦૨૫ ના રોજ એક પરિપત્ર બહાર પાડીને રાજ્યની તમામ શાળાઓમાં “સ્વચ્છતા પખવાડા 2025” ની ઉજવણી કરવા માટેની જાહેરાત કરવામાં આવી છે. ભારત સરકારના શિક્ષા મંત્રાલયના નિર્દેશ મુજબ, આ કાર્યક્રમ દર વર્ષની જેમ આ વર્ષે પણ યોજાશે.
ઉજવણીનો સમયગાળો: ૧૬ સપ્ટેમ્બર થી ૩૦ સપ્ટેમ્બર, ૨૦૨૫.
આ પખવાડાનો મુખ્ય ઉદ્દેશ્ય શાળાઓ, વિદ્યાર્થીઓ અને સમાજમાં સ્વચ્છતા અને આરોગ્યપ્રદ આદતો વિશે જાગૃતિ લાવવાનો છે.
પખવાડા દરમિયાન યોજાનારી મુખ્ય પ્રવૃત્તિઓ
પરિપત્રમાં જણાવ્યા મુજબ, શાળાઓમાં નીચે મુજબની વિવિધ પ્રવૃત્તિઓનું આયોજન કરવાનું રહેશે:
સ્વચ્છતા શપથ: તમામ શાળાઓમાં વિદ્યાર્થીઓ, શિક્ષકો અને સ્ટાફ દ્વારા સ્વચ્છતાના શપથ લેવામાં આવશે.
જાગૃતિ અને સભાઓ:શાળા વ્યવસ્થાપન સમિતિ (SMC) અને વાલીઓ સાથે બેઠકો યોજીને સ્વચ્છતા, હાથ ધોવાનું મહત્વ, અને પાણી બચાવવા જેવી બાબતો પર ચર્ચા કરવી.
શાળાની પાણી અને સ્વચ્છતાની સુવિધાઓનું નિરીક્ષણ કરી, જરૂર પડ્યે તેના સમારકામ માટેનું આયોજન કરવું.
સ્પર્ધાઓ:વિદ્યાર્થીઓ માટે સ્વચ્છતા અને આરોગ્ય વિષય પર નિબંધ, સૂત્રલેખન, ચિત્રકામ, ક્વિઝ અને મોડેલ બનાવવાની જેવી વિવિધ સ્પર્ધાઓનું આયોજન કરવું.
શાળાઓમાં સ્વચ્છ અને સુઘડ પરિસર તથા શૌચાલય માટેની સ્પર્ધાઓ યોજવી.
ગ્રીન સ્કૂલ ડ્રાઇવ:પાણી બચાવવા અને સિંગલ યુઝ પ્લાસ્ટિકનો ઉપયોગ બંધ કરવા પર ભાર મૂકવો.
શાળા પરિસરમાંથી દરેક પ્રકારનો કચરો, તૂટેલું ફર્નિચર અને બિનઉપયોગી સાધનોનો યોગ્ય નિકાલ કરવો.
.
વ્યક્તિગત સ્વચ્છતા અને પ્રદર્શન:હાથ ધોવાની સાચી રીત, નખ કાપવા, સ્વચ્છ કપડાં પહેરવા જેવી વ્યક્તિગત સ્વચ્છતાની આદતો વિશે વિદ્યાર્થીઓને શીખવવું.
પખવાડા દરમિયાન વિદ્યાર્થીઓ દ્વારા બનાવાયેલી કૃતિઓનું શાળામાં પ્રદર્શન યોજવું.
.
ઇનામ વિતરણ: પખવાડાના અંતે, વિવિધ સ્પર્ધાઓમાં વિજેતા થયેલા વિદ્યાર્થીઓ અને શિક્ષકોને ઇનામ આપીને પ્રોત્સાહિત કરવા.
મહત્વની સૂચના: ઓનલાઈન રિપોર્ટિંગ
આ કાર્યક્રમની દરેક દિવસની પ્રવૃત્તિઓની વિગતો, ફોટોગ્રાફ્સ અને વીડિયો રોજેરોજ રાજ્ય કક્ષાએથી આપેલ ગૂગલ ટ્રેકર પર અપલોડ કરવાના રહેશે. આ માટે બ્લોક અને જિલ્લા કક્ષાએ MIS કોઓર્ડિનેટર દ્વારા માહિતી એકત્રિત કરીને અપલોડ કરવાની રહેશે.
આ કાર્યક્રમમાં શાળાના શિક્ષકો, વિદ્યાર્થીઓ, SMC સભ્યો, વાલીઓ અને ગ્રામજનો ઉત્સાહભેર ભાગ લે અને તેને એક સફળ જનઆંદોલન બનાવે તે માટે આયોજન કરવા તમામ શાળાઓને સૂચના આપવામાં આવી છે.