💥🌐🌀 પાલક માતા પિતા યોજનાના ધારા ધોરણમાં સુધારો કરવા બાબત.

વંચાણે લીધા ક્રમાંક (૧) થી પાલક માતા-પિતા યોજના સમગ્ર રાજ્યમાં લાગુ પાડવા માટેના વહીવટી મંજૂરીનાં હુકમો કરવામાં આવેલ હતા. જેમાં વંચાણે લીધા ક્રમાંક (૨) થી પસ્તુત યોજનાના ધારા ધોરણમાં ફેરફાર કરવામાં આવેલ હતો. વંચાણે લીધા ક્રમાંક (૩) થી સહાય ૧૦૦૦/- થી વધારી ૩૦૦૦/- કરાયેલ છે. વંચાણે લીધા ક્રમાંક (૪) થી પાલક માતા પિતા યોજનાના ધારા ધોરણમાં સુધારો કરી ૦ થી ૧૮ વર્ષની ઉંમરના બાળકોના માતા-પિતા પૈકી પિતા મૃત્યુ પામેલ હોય અને માતાએ પુન:લગ્ન કરેલ હોય તેવા બાળકોને પણ આ યોજનાનો લાભ આપવાનું ઠરાવેલ છે. વંચાણે લીધા ક્રમાંક (૫) થી પાલક માતા પિતા યોજનાના ધારા ધોરણમાં ફેરફાર કરીને આ યોજનાનો લાભ ૦ થી ૧૮ વર્ષની ઉંમરના બાળકોના માતા-પિતા પૈકી માતા મૃત્યુ પામેલ હોય અને પિતાએ પુન:લગ્ન કરેલ હોય તેવાં કિસ્સામાં બાળક તેનાં પિતા સાથે ન રહેતું હોય અને સગા-સંબંધી પાસે રહેતું હોય તો તેવા સંજોગોમાં પણ બાળકોને આ યોજનાનો લાભ પ્રાપ્ત થાય તે ઉદ્દેશથી કુલ રૂ.૩૬૦ લાખની જોગવાઇનો વર્ષ ૨૦૨૩-૨૪ નાં અંદાજપત્રમાં સમાવેશ કરવાની નવી બાબતની દરખાસ્ત રજૂ કરેલ હતી. તથા વંચાણે લીધા ક્રમાંક (૬) થી નિયામકશ્રી, સમાજ સુરક્ષાની સદરહુ નવી બાબતની વહીવટી મંજૂરી આપવાની દરખાસ્ત સકારશ્રીની વિચારણા હેઠળ હતી.

હરાવ-

પુખ્ત વિચારણાને અંતે પાલક માતા-પિતા યોજનામાં નીચે મુજબનો સુધારો કરવામાં આવે છે.

“૦થી ૧૮ વર્ષની ઉંમરના બાળકોના માતા-પિતા પૈકી માતા મૃત્યુ પામેલ હોય અને પિતાએ પુન:લગ્ન કરેલ હોય તેવાં કિસ્સામાં બાળક તેનાં પિતા સાથે ન રહેતું હોય અને સગા-સંબંધી પાસે રહેતું હોય તો તેવા બાળકોને પણ આ યોજનાનો લાભ આપવાનો રહેશે.”

પાલક માતા-પિતા યોજનામાં ઉક્ત સુધારો કરતા સદરહુ યોજનાના સહાયનો લાભ આપવા અંગેની કુલ રૂ.૩૬૦.૦૦ લાખ (અંકે રૂપિયા ત્રણ સો સાઇઠ લાખ પુરા)ની વર્ષ ૨૦૨૩-૨૪ના અંદાજપત્રમાં સામેલ ઉક્ત બાબતને નીચે મુજબની શરતોને આધીન આથી વહીવટી મંજૂરી આપવામાં આવે

છે.

શરતો:

(૧) આ યોજનાનો સમયગાળો પાંચ વર્ષનો રહેશે.

(૨) આ યોજનાના લાભાર્થી ૧૦ વર્ષથી મોટી ઉંમરના બાળકના કેસમાં, બાળકના નામનું અલગ બેંક ખાતુ ખોલાવીને તે ખાતામાં જ ડાયરેક્ટ બેનીફીટ ટ્રાન્સફર(DBT)થી માસિક સહાયની રકમ જમા કરવામાં આવશે, જ્યારે ૧૦ વર્ષ કે તેથી નાની ઉંમરના બાળકના કેસમાં, અનાથ બાળકના ઉછેરની જવાબદારી જે વ્યક્તિએ ઉપાડી હોય તે વ્યક્તિના પોતાના એકલાના નામે જ બેંક ખાતું (Bank A/C in Singal name)ખોલવીને તે ખાતામાં ડાયરેક્ટ બેનીફીટ ટ્રાન્સફર(DBT)થી માસિક સહાયની રકમ જમા કરવામાં આવશે. ૧૦ વર્ષ કે તેથી નાની ઉંમરનુ બાળક જ્યારે ૧૦ વર્ષથી વધુ ઉંમરનુ થાય ત્યારે તે બાળકના નામનું અલગ બેંક ખાતુ ખોલાવીને તે ખાતામાં માસિક સહાયની રકમ ડાયરેક્ટ બેનીફીટ ટ્રાન્સફર (DBT)થી જમા કરવામાં આવશે.

(૩) આ યોજના હેઠળ નિયત થયેલ લાભાર્થીઓની મર્યાદામાં જ તેમજ અંદાજપત્રિય જોગવાઇની મર્યાદામાં જ સહાય ચુકવવાની રહેશે. કોઇપણ સંજોગોમાં આ યોજના હેઠળ નિયત નાણાકિય મર્યાદા અને લાભાર્થીની સંખ્યા વધે નહી તે મુજબનુ આયોજન કરવાની તકેદારી નિયામકશ્રી(સ.સુ.)ની રહેશે.